LDK akuzon qeverisjen lokale për dështim në sigurimin e ngrohjes për shkollat e Podujevës

Podujevë, 12 dhjetor 2024 – Dega e Lidhjes Demokratike të Kosovës (LDK) në Podujevë ka reaguar me shqetësim ndaj situatës alarmante në shkollat dhe çerdhet e komunës, duke akuzuar qeverisjen lokale për paaftësi në sigurimin e ngrohjes gjatë muajve të ftohtë të dimrit.

Sipas komunikatës së LDK-së, qeverisja e udhëhequr nga Shpejtim Bulliqi ka dështuar të furnizojë me kohë institucionet arsimore me dru dhe pelet, duke lënë nxënësit, mësimdhënësit dhe stafin e shkollave në kushte të vështira. Aktualisht, ngrohja nëpër shkolla funksionon vetëm disa orë në ditë dhe me kapacitet minimal, duke rrezikuar seriozisht shëndetin e nxënësve dhe duke penguar procesin mësimor.

Postimi i LDK-së

KOMUNIKATË PËR MEDIE
Podujevë 12 dhjetor 2024

Të nderuar qytetarë të Podujevës,

LDK, në Podujevë me shqetësim të thellë, po i ndjek dështimet e njëpasnjëshëm të pushtetit lokal në Podujevë për të siguruar edhe parakushtet më themelore për funksionim normal të shkollave dhe çerdheve e komunës së Podujevës. Në një kohë kur arsimi dhe mirëqenia e fëmijëve duhet të jenë prioritet i çdo qeverisjeje, shkollat dhe çerdhet e Podujevës janë lënë në mëshirën e fatit, sepse edhe pse jemi ne mesin e muajit dhjetor, kjo qeverisje nuk ka arritur të sigurojë lëndë djegëse (dru dhe pelet) për ngrohjen e tyre.

Ndërsa dimri ka ardhur dhe temperaturat kanë rënë ndjeshëm, ngrohjet në shkolla funksionojnë vetëm disa orë në ditë dhe atë me kapacitet minimal. Nxënësit tanë, mësimdhënësit dhe stafi shkollor janë të detyruar të qëndrojnë në klasa të ftohta, duke rrezikuar shëndetin dhe duke humbur orët mësimore.

Kjo qeverisje lokale ka dëshmuar paaftësi totale dhe mungesë të thellë përgjegjësie.

Si mund të presim cilësi në arsim, kur as kushtet më elementare, si ngrohja në shkolla, nuk sigurohet, as tani kur jemi në fund të gjysmëvjetorit të parë të vitit shkollor 2024/2025!

Pushteti lokal i Shpejtim Bulliqit ka dështuar në çdo hap të menaxhimit:
• Në vend që të planifikojë dhe realizojë me kohë furnizimin me dru dhe pelet, kemi parë ndërhyrje, favorizime dhe vonesa të pajustifikueshme në proceset tenderuese.
• Në vend që të marrë përgjegjësinë, kjo qeverisje ka zgjedhur të mbulojë dështimin me zgjidhje të improvizuara dhe skandaloze, si përdorimi i druve të konfiskuara, në kundërshtim të plotë me rregullativën ligjore.
• Në kulmin e këtij dështimi, pushteti lokal tani po përpiqet të përdorë thëngjill si lëndë djegëse, duke shkelur vendimin e Qeverisë së Kosovës të vitit 2018, që ndalon përdorimin e thëngjillit për ngrohje në institucionet publike.

Ky është një skandal i paprecedent dhe një turp për këtë qeverisje të paaftë!

Kalldajat në shkollat e Podujevës janë të destinuara për dru dhe pelet, ndërsa përdorimi i thëngjillit rrezikon funksionimin teknik, shëndetin e nxënësve dhe stafit, si dhe ndikon negativisht në cilësinë e ajrit. Fëmijët tanë nuk mund të jenë viktima të një qeverisjeje që dështon të sigurojë edhe gjërat më bazike.

Andaj i bëjmë thirrje qeverisjes komunale që të bëjë:
1. Furnizim të menjëhershëm dhe të qëndrueshëm të shkollave dhe çerdheve me dru dhe pelet, në përputhje me të gjitha standardet ligjore dhe mjedisore.
2. Përgjegjësi dhe transparencë të plotë për vonesat dhe dështimet e njëpasnjëshme.
3. Ndërprerje e menjëhershme e çdo tentative për përdorimin e thëngjillit në shkolla, në kundërshtim me ligjin dhe rregulloret.
Kjo qeverisje ka humbur çdo kredibilitet.

LDK – Dega Podujevë do të vazhdojë të denoncojë këtë keqqeverisje dhe të mbrojë interesat e qytetarëve. Nuk do të heshtim derisa fëmijët tanë të kenë kushtet e nevojshme në shkollat tona.

Zyra për mardhënje me publikun dhe informim
LDK – Dega Podujevë