Rreziku i braktisjes së shkollës nga nxënësit e komunitetit joshumicë në Podujevë

Dy nxënës, një vajzë dhe një djalë, pjesëtarë të komunitetit joshumicë në Komunën e Podujevës e kanë braktisur shkollën në vitin e fundit shkruan Telegrafi.

Po ashtu shqetësues është fakti se gjashtë nxënës të tjerë, tre djem dhe tri vajza, janë në rrezik të braktisjes së shkollimit për arsye të ndryshme.

Një rast tejet shqetësues është mungesa e një nxënësi të klasës së parë, i cili që nga fillimi i këtij viti nuk e ndjek shkollimin.

Zyrtarët e shkollave në Komunën e Podujevës prapa kamerave shprehen se po bëjnë çmos për t’i rikthyer këta nxënës pranë bashkëmoshatarëve të tyre, por sipas tyre, edhe kushtet e tyre ekonomike janë goxha të rënda.

Ndërkaq, familjarë të disa prej këtyre nxënësve prapa kamerave theksojnë se me mundësitë që kanë, ata u ofrojnë fëmijëve kushte të përballueshme dhe përpiqen t’i mbajnë ata të barabartë me nxënësit e tjerë.

Bajram Ilazi, koordinator i programit të edukimit në organizatën “Zëri i Romëve, Ashkalinjve dhe Egjiptianëve”, tregon se dy qendrat e hapura në Podujevë ofrojnë kujdes, trajnime dhe mbështetje të vazhdueshme për pjesëtarët e këtyre komuniteteve.

“Është e rëndësishme ta theksojmë se braktisja e shkollimit ndodh për shkak se nxënësit e këtyre komuniteteve nuk janë në hap me bashkëmoshatarët e tyre, sidomos në mësime, për shkak se prindërit e këtyre komuniteteve nuk janë mjaftueshëm të shkolluar që t’i ndihmojnë.

Pa dyshim se hapja e këtyre dy qendrave ka ndikuar që nxënësit e komuniteteve të jenë më të rregullt në shkollë”, shton Ilazi. /Valëza Fusha/