“I kam kaluar sfidat sepse jam e fortë”, historia prekëse e gruas nga Podujeva

Një grua e fortë, që kaloi shumë sfida në jetë është Elmaze Perani nga Podujeva.

Si fëmijë ajo hasi në vështirësitë e jetës, duke mbetur pa nënën në moshën 9 vjeçe, e duke u bërë vet nënë për gjashtë vëllezërit e saj, njofton Klankosova.tv.

Jo vetëm kaq, ajo u përballë edhe me sëmundje të rënda, të cilat me karakter të fortë e me humor i kaloi.

Në emisionin “Kosova Today”, Elmazja me buzëqeshje i rrëfen këto histori aspak të lehta për të.

“Unë jam Elmazi, vij nga një qytet i vogël i Kosovës, Podujeva. Jam lind dhe rritur në Podujevë, ku rininë dhe fëmijërinë e kam kaluar në Podujevë. I falënderohem pikë së pari familjes sime, babës tim, vëllezërve, mahallës, shoqërisë, të cilët më kanë përkrahur po nga ajo ditë që unë kam mbetur pa njërin prind, pa nënën. Ish 9 vjeçe kur mbeta pa nënën. I kisha gjashtë vëllezër, babën dhe gjyshen, në atë kohë kur më vdiq nëna. Jetoj edhe dy vjet e gjysmë, edhe gjyshja. Por ishte e sëmurë. Unë u bëra nënë e vëllezërve të mi. I kisha dy më të vegjël e katër më të mëdhenj dhe babën, kështu që isha e vetmja femër në shtëpi. Paramendoje një fëmijë, vetëm, një shtalb. Unë isha 9 vjeçe, njëri vëlla më i vogël 6 vjet e tjetri 3. Kështu u lidha me ta. Çka të them, e di që është pak e vështirë të flasësh për fëmijërinë time”, u shpreh Elamazja.

“Njerëzit kur më shohin nuk më besojnë se i kam kaluar disa kancere, kam pas edhe një sulm një zemër.  Unë i kam kaluar të gjitha këto sfida, por unë prapë jam e fortë, ma merr mendja që i kaloj, i kam kaluar, i kaloj edhe këto”.

“Mundohem të jem gjithmonë e buzëqeshur, kurrë të mos e rrëfej ndonjë rrëfim të vështirë”, tha ajo.