Ky është çifti që u aksidentuan sot (VIDEO)

Përfundoi në mes të udhëve, në shtyllë.

Ali Hoxha nuk pati zgjidhje tjetër pos kësaj, kur iu desh ta evitojë përplasjen me një makinë tjetër, për të cilën ai thotë se po i vinte direkt, nga kahu tjetër, teksa të hënën në mesditë po kalonte nëpër rrugën “Skënderbeu” në Malishevë.

Ani se përballja me shtyllën nuk ishte e lehtë, ngasës nuk pësoi lëndime vetë.

Gruaja e tij, që ndodhej me të në makinë, po.

Ajo u dërgua për trajtim në qendrën e mjekësisë familjare në Malishevë.

Policët që nuk u vonuan shumë, i kryen hetimet e nevojshme.

Pavarësisht pretendimeve të ngasësit se një makinë tjetër po i vinte nga kahu i kundër, forcat e rëndit, fillimisht, e bënë Hoxhën me faj për siç thanë, vetaksidentin e shkaktuar, e po ashtu edhe motin me reshje që po mbante në kohën e ndeshjes, raporton Klan Kosova.

Megjithatë, nga policia thanë se rrethanat finale të aksidentit do të dihen pas hulumtimeve shtesë.

Ekipi i Klan Kosovës ka qenë dëshmitar direkt i kësaj ngjarje dhe ka parë se ndeshja u shkaktua pikërisht për faktin se ngasësi u detyrua të godasë shtyllën duke evituar një aksident direkt me makinën që po i vinte përballë.