Ekskluzive: Kjo është kompania që u grabit nga hajnat në parkingun e ‘Viva Freshit’
Një vjedhje e rëndë spektakolare ka ndodhur dje rreth orës 16:50 në parkingun e Viva Fresh Store në magjistralen Ferizaj-Prishtinë, tek rrethi i KFC, ku hajnat kanë marrë mbi 19,000 euro nga pazari ditor i një kompanie, duke vepruar brenda pak sekondave.
Sipas burimeve ekskluzive të Sinjalit, dy punëtorë të kompanisë “Korabi”, të cilët po bartnin pazarin ditor për deponim – kishin ndaluar për të bërë disa blerje të shpejta në vetëshërbimin e Viva Fresh Store.
Por momenti i pakujdesisë së tyre u shfrytëzua nga të dyshuarit, që lëviznin me një veturë Volkswagen Passat B6, ngjyrë e kaltër.
Njëri nga të dyshuarit, që ishte pasagjer në veturë, ka zbritur shpejt, ka thyer xhamin e kombit të Kompanisë “Korabi” dhe ka marrë paratë e pazarit ditor, që sipas burimeve arrijnë shumën e saktë prej 19,287 eurosh. Pas grabitjes, të dyshuarit janë larguar me shpejtësi në drejtim të panjohur.
Në momentin e ngjarjes, në vendin e ngjarjes kanë qenë të pranishëm pronari i kompanisë, zyrtari financiar dhe disa dëshmitarë. Të gjithë kanë mbetur të shokuar nga mënyra e shpejtë dhe e organizuar e grabitjes.
