Hajnat i futen llapjanit në shtëpi natën e Vitit të Ri

Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. E shumë prej hajnave ‘angazhohen’ sidomos në ditët e festave, kur shumë qytetarë mblidhen në një vend për të festuar, e shtëpitë e tyre mbesin të mbyllura, raporton Gazeta Sinjali.

Kështu ndodhi në një shtëpi në Penuhë të Podujevës, ku persona ende të paidentifikuar dyshohet se kanë kryer vjedhje në periudhën kohore mes 31 dhjetorit dhe 1 janarit.

Sinjali mëson se pronari i shtëpisë ka denoncuar rastin në Polici, ku ka deklaruar se hajnat kanë depërtuar brenda dhe kanë vjedhur stoli ari që kapin vlerën e rreth 20 mijë eurove.

Si rezultat i raportimit, njësitë policore kanë kryer ekzaminimet e nevojshme që ndihmojnë në zbardhjen e rrethanave të rastit dhe çojnë në identifikimin e personave të dyshuar.

Me urdhër të prokurorit, rasti është cilësuar ‘Vjedhje e rëndë’.