Dafina Zeqiri dështon në Suharekë, fansat ndihen të tradhtuar pasi nuk u kthehen paratë

Mbrëmjen e kaluar ishte planifikuar një event muzikor në Klubin “Infinit” në Suharekë, ku këngëtarja e njohur Dafina Zeqiri ishte paralajmëruar të performonte. Biletat për këtë mbrëmje ishin shitur me çmimin prej 10 eurosh për person, mirëpo ngjarja nuk u zhvillua sipas planit.

Sipas burimeve të Sinjalit, Dafina Zeqiri nuk ka dalë në skenë për të performuar, pasi numri i të pranishmëve ishte shumë i vogël. Kjo ka lënë të zhgënjyer ata që kishin paguar për të ndjekur performancë e këngëtares.

Shumë prej klientëve ndihen të tradhtuar, jo vetëm për mungesën e performancës, por edhe për faktin se paratë që ata kanë paguar për biletat nuk u janë kthyer. Kjo ka shkaktuar reagime dhe pakënaqësi, me disa prej tyre që kërkojnë një sqarim ose kompensim për dëmin e shkaktuar.

Se mbrëmja ka dështuar dhe fansat janë indinjuar, ku tashmë është postuar dhe një video në rrjete sociale, ku shihen një numër jo fort i madh i të pranishmëve, teksa në sfond dëgjohen këngë të lëshuara nga DJ-të e mbrëmjes.

Deri më tani, menaxhmenti i Klubit “Infinit” dhe vetë Dafina Zeqiri nuk kanë bërë asnjë deklaratë zyrtare për situatën. Ndërkohë, fansat e saj në Suharekë presin një reagim dhe zgjidhje për këtë rast që ka zhgënjyer shumë njerëz.

Sinjali ka tentuar të kontaktojë me diskotekën në fjalë, por që të njëjtit nuk janë përgjigjur.