Tra;gjedia: “Djali vdiq pas 7 minutave në spital” (VIDEO)

Shkëlqim Pllana, 17-vjeç dhe Malsor Pllana, 19-vjeç humbën jetën tragjikisht në një aksident trafiku, dy vjet më parë, në afërsi të fshatit Gojbulë të Vushtrrisë.

Vdekja e të rinjve tronditi vendin e familjet e tyre. Madje, nga mërzia e madhe, vetëm tre muaj pas këtij rasti, vdiq edhe babai i Malsorit, Muharremi.

Por, historia e vdekjes së të rinjve nuk u varros me ta. Më shumë se dy vjet pas tragjedisë, dikush po e akuzon një person të tretë për shkaktimin e këtij aksidenti dhe po kërkon që ai të marrë dënimin e merituar.

Një telefonatë që e pranoi të mërkurën e 2 nëntorit të 2022-ës, e gjunjëzoi përjetësisht Bedri Pllanën nga Vushtrria.

Një zë i shqetësuar e njoftoi se djali i tij 17-vjeçar, Shkëlqimi, kishte pësuar aksident të rëndë trafiku në rrugën transitore Smrekonicë – Gojbulë.

Bashkë me 17-vjeçarin në veturë kishte qenë edhe kushëriri i tij, Malsor Pllana, 19-vjeçar, i cili ndërroi jetë në vendin e ngjarjes.

Si pakrye, Bedriu ishte nisur për në shtëpi dhe nga shoku që e përjetoi, mezi arriti të njoftonte familjen për rastin.

17-vjeçari nuk u bëri ballë për shumë gjatë plagëve të aksidentit. Vetëm 7 minuta pasi që prindërit dhe motra e tij mbërritën në spital, mjekët i njoftuan për vdekjen e tij.

Bedriu i cili në atë moment thotë se iu shemb bota para syve, mendon se i biri i tij e kishte parandjerë vdekjen mëngjesin e asaj dite, kur e kishte parë për të fundit herë.

Dy të rinjtë u varrosën të nesërmen, por me mbylljen e varreve, nuk u mbyll misteri i vdekjes së tyre.