36-vjeçari e rrah të dashurën në ‘Villa Diamonds’, ajo arrin të ikë dhe e denoncon në Polici

Vajzat dhe gratë po vazhdojnë të jenë viktimat më të shpeshta të dhunës që përjetojnë kryesisht nga partnerët e tyre. Kjo dukuri shqetësuese ka marrë përmasa të mëdha kohëve të fundit dhe kjo po dëshmohet çdo ditë me numrin e këtyre ngjarjeve që denoncohen në Polici, raporton Gazeta Sinjali.

Një rast i tillë është raportuar të martën nga një 34-vjeçare, e cila e ka denoncuar për dhunë fizike personin me të cilin ka qenë në lidhje dashurie.

Burimet e Gazetës Sinjali kanë bërë me dije se viktima ka kërkuar ndihmën e Policisë pasi arriti të ikë nga i dashuri 36-vjeçar, me të cilin kanë qëndruar në ‘Villa Diamonds’ në Fushë Kosovë, ku edhe dyshohet se ndodhi rasti.

Sipas dëshmisë së saj, i dyshuari e ka sulmuar fizikisht, duke e goditur në vazhdimësi, mëngjesin e djeshëm pasi kaluan natën bashkë dhe nisën mosmarrëveshjet mes tyre.

Si rezultat i denoncimit, Policia është aktivizuar dhe ka arrestuar të dyshuarin.

Pas përfundimit të procedurave policore, Prokurori i Shtetit ka urdhëruar inicimin e rastit ndaj tij për veprën penale ‘Dhuna në familje’.