Murati: Këto janë kategoritë që do të përfitojnë rritje mbi 20 për qind të pensioneve

Ministri i Financave, Hekuran Murati ka thënë se tri kategori të dala nga lufta do të përfitojnë rritje mbi 20 për qind të pensioneve.

Ai ka shpjeguar se rritje mbi 20 për qind do të kenë familjet e dëshmorëve të UÇK-së të cilët kanë dy ose më tepër dëshmorë, familjet e të zhdukurve të UÇK-së që kanë dy ose më tepër të zhdukur dhe familjet e viktimave civile apo të zhdukurve civilë që kanë dy ose më tepër viktima apo të zhdukur.

“Rritje mbi 20 për qind do të përfitojnë familjet e dëshmorëve të UÇK-së, për familjet që kanë dy dëshmor ose më tepër. Janë familjet e të zhdukurve të UÇK-së, po ashtu për familjet që kanë dy të zhfukur ose më tepër. Po ashtu për familjet e viktimave civile apo të zhdukurve civilë është ndjekur i njëjti parim”, ka thënë ai.

Ai ka thënë se ky vendim për rritje të pensioneve të kategorive të dala nga lufta ka ardhur dhjetë vjet pasi këto skema kanë që të pandryshuara.

Deri në 20 për qind rritje të pensioneve do të përfitojnë të gjitha kategoritë e dala nga lufta, sipas një vendimi të miratuar sot në mbledhjen e qeverisë.

Sa i përket shifrave të rritjeve të pensioneve, Murati tha se ka disa kategori dhe disa nënkategori.