Si u mashtruan mbi 10 mijë shqiptarë për “fitimin” e një veture falas?

Mbi 10 mijë qytetarë të Kosovës vendosën ngjyrën e preferuar të veturës së tyre në një postim që gjetën në rrjetin social Facebook, me pretendimin se do të bëheshin një nga fituesit e 3 veturave të markës koreano-jugore Kia.

Shqiptarët ia besuan verbërisht këtij postimi, i cili fliste për gjoja shpërndarjen e dhuratave të ndryshme dhe 3 veturave nga Kia Dealer që po dhuroheshin në 72-vjetorin e themelimit të kësaj kompanie.

Postimi, që rezultoi të ishte një tjetër mashtrim në rrjetet sociale, ishte i menduar mirë në çdo detaj dhe synonte vjedhjen e kredencialeve të personave që komentonin për t’u bërë pjesë e lojës shpërblyese.

Postimi, i publikuar më 25 tetor të këtij viti, mori mbi 10 mijë komente nga qytetarët shqiptarë, të cilët e pranuan si të vërtetë dhe madje uruan kompaninë për ditëlindjen e saj.

Në momentin që qytetarët komentonin ngjyrën e preferuar të veturës, për t’u bërë sa më realë, administratorët e faqes automatikisht u dërgonin nga një mesazh në Messenger, ku u kërkohej adresa e plotë e banimit.

Por vendosja e komentit nuk ishte kushti i vetëm për t’u bërë pjesë e kësaj loje shpërblyese; ata obligoheshin që postimin e njëjtë ta shpërndanin në të paktën 15 grupe. Më pas u thuhej se duhet të prisnin verifikimin nga faqja për të parë nëse e përmbushnin kushtin për të qenë fitues të njërës nga veturat e publikuara.

Pas këtij verifikimi, mashtruesit u dërgonin edhe një link tjetër ku duhet të klikonin për gjoja vërtetimin e procedurave. Por, në momentin që ata vendosnin kursorin mbi link, automatikisht merreshin të gjitha të dhënat personale të viktimave.

Loja nuk përfundonte këtu, pasi mashtruesit vazhdonin të kontaktonin viktimat dhe u kërkonin që të klikojnë në një link tjetër, duke marrë kështu akses në të dhënat e tyre personale.

Postimi tjetër ishte krijuar nën skemën e një ndarjeje dhuratash përmes dhjetë kutive, të cilat, sipas mashtruesve, tri prej tyre përmbanin çelësa të veturave që mund të fitoheshin