Vjedhje grabitqare në ‘Viva Fresh’, i mituri e sulmon sigurimin pasi e kapi në flagrancë

Marketet në vendin tonë kanë qenë dhe vazhdojnë të jenë cak i vjedhjeve dhe grabitjeve, ku hajnat arrijnë të kapin para apo gjësende ushqimore. Raste të shumta kanë ndodhur në pikat e rrjetit të Viva Fresh në plot qytete. Përveç humbjeve, plaçkitjet po shkaktojnë pasiguri si për punëtorët ashtu edhe për klientët, raporton Gazeta Sinjali.

Kështu ka ndodhur edhe mbrëmë në pikën e Viva Fresh Store në rrugën “Mehmet Gradica” në Prishtinë, ku një person arriti të vjedh produktet ushqimore.

Sinjali ka marrë vesh se i dyshuari është i moshës së mitur dhe i njëjti ndonëse tentoi të ikë, u ndalua nga një punëtor i sigurimit.

Ndonëse nuk arriti të shpëtojë pa u kapur, i mituri po dyshohet se e ka sulmuar fizikisht sigurimin – derisa erdhi Policia dhe e arrestoi.

I njëjti është shoqëruar në stacion policor, ku është intervistuar lidhur me rastin.

Ndaj tij, pas përfundimit të procedurave policore, është nxjerrë aktvendim për ndalim dhe inicimin e rastit për veprën “Vjedhje grabitqare”.