Kjo është aryseja e grevës nga autobusët e linjës Podujevë – Prishtinë
Kompanitë e linjave të autobusëve që qarkullojnë nga Podujeva në Prishtinë dhe anasjelltas kanë ndaluar autobusët e tyre në shenjë të pakënaqësisë.
Këta të fundit kanë refuzuar të vihen në funksion të qarkullimit si linja transporti, për shkak të një vendimi nga Komuna e Prishtinës, sipas së cilit linjat e autobusëve urbanë do të shtohen, e kësisoj llapjanëve t’u mundësohet qarkullimi nga Prishtina në disa prej fshatrave në Podujevë përmes autobusëve urban.
E ky vendim ka ngjallur pakënaqësi të shumta tek linjat e autobusëve, të cilët kanë vendosur që të mos marrin më asnjë udhëtarë e të futen në grevë.
Për lajmin.net, ata thanë se se pas këtij vendimi ka rënë edhe numri i udhëtarëve dhe se tashmë e kanë të vështirë të punojnë dhe se ky vendim sado që ishte i vështirë, ishte i pashmangshëm.
“Këto vendime nuk e kanë pëlqimin e Komunës së Podujevës dhe as të shoqatës. Nuk ka të drejtë askush në rrugë të magjistrales të marrë udhëtarë. Komuna mund të lëshojë linja, por prej Bardhoshit deri në Vranidoll, autobusi duhet të vijë me dyer të mbyllura, as të marrë e as të zbret ndonjë udhëtarë. Autobusët e trafikut urbanë po marrin udhëtarë dhe po na dëmtojnë shumë”, tha një prej protestuesve, i cili tha se edhe pse janë ankuar, askush nuk u ka bërë zgjidhje.
Një tjetër përfaqësues i njërit prej kompanive të autobusëve tha se pas vendimit të Komunës së Prishtinës kanë shumë më pak udhëtarë, gjë që ka nxitur edhe reagimin e tyre.
“Me këto kushte që ka ofruar Komuna për këta autobusa që u ka lejuar të operojnë me kilometër, bileta të ta është minimale. Për udhëtarët e Komunës së Prishtinës kjo është e leverdishme për shkak të çmimit të ulët, kurse për udhëtarët e Podujevës kemi keqardhje që e kemi ndërprerë punë, por nuk kemi pasur zgjidhje tjetër”, tha ai.
Ai shtoi se që nga hyrja në fuqi e këtij vendimi, nuk janë ndalur duke kërkuar zgjidhje por që deri më tani pa sukses.
Se a do të ketë marrëveshje mes Komunës së Prishtinës dhe kompanive të autobusëve mbetet të shihet ditëve në vijim. /Lajmi.net/
