Pezullohet përkohësisht greva e autobusëve të linjës Podujevë

Shoqata e Transportit “Podujevë-Prishtinë” ka njoftuar pezullimin e përkohshëm të grevës pas një takimi të mbajtur sot me përfaqësues të Komunës së Prishtinës.

Kryetari i Shoqatës, Beqir Mustafa, deklaroi se presin që komuna, e udhëhequr nga Përparim Rama, të adresojë shqetësimet e tyre sa më shpejt.

“Ata janë zotuar se do t’i heqin stacionet në magjistralen Prishtinë-Podujevë. Ne kemi kërkuar që të ndalen të gjitha linjat e komunës pasi janë në kundërshtim me ligjin. Greva ndërpritet përkohësisht deri në një vendim tjetër,” tha Mustafa për IndeksOnline.

Tutje, ai shtoi se Shoqata ka kërkuar gjithashtu që Komuna e Prishtinës të rishqyrtojë vendimet e saj dhe të respektojë konkurrencën e ndershme dhe kornizën ligjore në fuqi.

Ditë më parë, përmes një deklarate publike, Shoqata shpjegoi se veprimet e komunës, përmes lëshimit të linjave të reja pa respektuar të drejtat e operatorëve ekzistues, kanë sjellë dëme të mëdha financiare që kërcënojnë falimentimin e plotë të biznesit dhe humbjen e vendeve të punës./IndeksOnline/