Dyshohet se zjarri në Emshir ndodhi nga një hakmarrje e një femre ndaj të dashurit

Një zjarr i rënë mbrëmë në një prej komplekseve banesore në Emshir (Kalabri) tronditi Prishtinën.

Dhjetëra banorëve të objektit iu nevojit ndihma mjekësore, sakaq të njëjtit u nxorën nga objekti me asistencën e zjarrfikësve.

IndeksOnline raporton se zjarri u vë në podrum të objektit, ku gjendeshin veturat e banorëve rezidentë të asaj ndërtese. Disa prej veturave u dëmtuan nga ky incident, dhe banorët kanë kaluar sot pjesën më të madhe të ditës pa rrymë dhe ngrohje.

Burime të IndeksOnline pohojnë se zjarri është vënë qëllimisht nga një e dyshuar, që dyshohet të ketë pasur cak vetëm veturën e të dashurit të saj.

Femra në fjalë, sipas burimeve të IndeksOnline, i vuri zjarrin makinës së të dashurit, në shenjë hakmarrjeje, duke mos qenë e vetëdijshme që zjarri mund të shpërndahet dhe të shkaktojë dëme të mëdha.