Mustafa: Pushteti ka humbur betejën, qytetarët po zgjedhin LDK-në

Deputeti i LDK-së, Besian Mustafa në një konferencë të thirrur për media, tha se kjo parti po ka prezencë rekorde të njerëzve në tubimet e saj.

Ai krahasoi tubimet e LDK-së me të partisë në pushtet, ku tha se LDK-së po i mblidhen më shumë përkrahës në një lagje, se sa VV-së në të gjithë qytetin, transmeton Klankosova.tv.

“Çdo ditë që po kalon, më shumë njerëz po i bashkohen Lidhjes Demokratike të Kosovës. Kosova është e gatshme për ndryshim. Më shumë po ka përkrahës LDK-ja në një tubim në mahallë, sesa VV-ja në të gjithë qytetin. Entuziazmi për fitoren e madhe të LDK-së, edhe në fshatra po e tejkalon tubimet e pushtetit në kryeqendra. Ka prezencë në numra rekord, në çdo tubim të LDK-së, në çdo lagje, në çdo fshat e në çdo qytet të Kosovës”.

Mustafa shton se pushteti, tanimë ka humbur betejën, e qytetari i Kosovës po zgjedh LDK-në.

“Pushteti tanimë e ka humbur bejten. Po mundohen të duken kinse po punojnë këtë muaj të fundit gjatë fushatës, pa prekur punë me dorë në katër vjet mandat”, shtoi tutje Mustafa.

Ai u bëri thirrje qytetarëve që të dalin ta votojnë LDK-në, e që vota e tyre ta sjell ndryshimin në Kosovë.

“Qytetarët e kanë të qartë, dhe e kanë vendosur se cila është adresa për të zhvilluar Kosovën në katër vitet e ardhshme. Partinë e vetme me vizion dhe program të qartë, Lidhjen Demokratike të Kosovës. Andaj ftoj të gjithë qytetarët të na bashkohen. Këto zgjedhje janë jetike, nëse i doni të mirën të ardhmes së Kosovës, nuk mund të qëndroni në shtëpi, nuk mund të qëndroni neutral, duhet të ngriheni e të votoni për ndryshim, të votoni LDK-në”, tha ai. /klankosova.tv