Rrahje masive, njëri nga të dyshuarit kërcënon me armë zjarri

Posedimi i armëve të zjarrit është shndërruar në një dukuri negative, pasi që përpos që është e kundërligjshme, po cenohet edhe siguria e qytetarëve. Personat e armatosur shpesh herë ato i përdorin për të kërcënuar ata me të cilët kanë telashe, por ka raste që përpos që i frikësojnë, i shkrepin ato dhe gjithçka përfundon tragjikisht, raporton Gazeta Sinjali.

Një rast i tillë ka ndodhur mbrëmë rreth orës 18:20 në lagjen Arbana në Prizren, ku disa persona janë përleshur fizikisht mes vete.

Sinjali mëson se në rrahje janë përfshirë pesë persona, ku njëri nga ta ka nxjerrë edhe një armë zjarri, me të cilën ka kërcënuar personat me të cilët ishte konfrontuar.

Falë denoncimit, intervenimi i Policisë ka qenë shumë i shpejtë, me ç’rast kanë arritur që t’i arrestojnë në vendin e ngjarjes personat e dyshuar. Ndërkohë është konfiskuar edhe arma e zjarrit e cila dyshohet që u përdor në rast.

Me urdhër të prokurorit, ndaj të dyshuarit i cili ka kanosur viktimat me armë zjarri është iniciuar rasti për veprat ‘Kanosje’ dhe ‘Mbajtje në pronësi, kontroll ose posedim të paautorizuar të armës’. Ai dhe një i dyshuar tjetër që u përfshi në rrahje, me urdhër të prokurorit janë ndaluar për 48 orë.