Kurti: Puna jonë nuk motivohet nga fitimi, por nga rritja ekonomike

Kryeministri i Kosovës, Albin Kurti njëherit i mandatuari edhe për një mandat nga Lëvizja Vetëvendosje, ka thënë se nga ShBA do të blejnë helikopterë për Ushtrinë e Kosovës.

Në fjalimin e tij në Ferizaj, Kurti ka thënë se puna e tyre nuk motivohet nga fitimi apo përfitimi, por nga rritja ekonomike dhe zhvillimi i demokracisë.

“Prodhimin po ia kthejmë ekonomisë e mirëqenien po ia sjellim shoqërisë. Nga progresi, drejt demokracisë, Kosova ka ndërtuar progres demokratik. Puna jonë nuk motivohet nga fitimi apo përfitimi personal, por nga rritja ekonomike dhe zhvillimi demokratik”, ka thënë Kurti, thuhet në komunikatën e VV-së.

Ministri i Financave, Punës dhe Transfereve, Hekuran Murati, tha se për herë të parë në historinë e vendit ka patur mbështetje për bizneset prodhuese, duke ua subvencionuar kreditë investuese deri në 20 për qind, ku vetëm në Ferizaj janë 71 biznese që janë mbështetë me 2.7 milionë euro për të investuar në kapacitete prodhuese.

“Ka qenë qeveria Kurti ajo që e ka thy rekordin e investimeve kapitale me 654 milionë euro në vitin 2024, po për më tepër edhe e ka ulur borxhin e faturave të papaguara ndaj bizneseve nga 140 milionë në vetëm 30 milionë euro, pra kështu mbështeten bizneset”, tha Murati.

Ndërsa, ministrja e Drejtësisë, Albulena Haxhiu, tha se “Reforma në drejtësi dhe ligji për Byronë për Konfiskimin e Pasurisë së Pajustifikueshme është bërë kërcënim për opozitën, sa herë flasim për byronë, ata ndihen të kërcënuar. Ne insistojmë aq shumë në vetting, e këta, opozitë e prokurori, insistojnë e angazhohen kaq shumë kundër vettingut sepse janë bërë bashkë. Ne jemi bërë bashkë me popullin e ata me njëri tjetrin, për ta penguar reformën, zhvillimin dhe përparimin e vendit”, tha ajo

Kandidatja për deputete Fatbardha Zogaj Reka tha se qeveria Kurti është qeveri për të gjithë, e cila mundësoi shtesat për fëmijë, mbështetje për nenat lehona, rritje të pensioneve për të gjitha kategoritë, subvencionim të pagesës së energjisë elektrike dhe pajisjeve efiçiente për ngrohje, rritje të subvencioneve për bujqit, arsim publik të lartë falas, e programin Superpuna, që janë vetëm disa nga shembujt se paraja e shtetit nuk shkon më në xhepat e politikanëve zhvatës, por drejt familjeve e qytetarëve./teve1.info/