Podujevë: Përurohet objekti i ri i sallës së sporteve në SHFMU ‘Naim Frashëri’
Kryetari i Podujevës, Shpejtim Bulliqi ka njoftuar që është përuruar objekti i ri i sallës së sporteve në SHFMU ‘Naim Frashëri’.
Më poshtë postimi i tij:
E përuruam objektin e ri të sallës së sporteve në ShFMU “Naim Frashëri”
Bashkë me Ministren e Arsimit, Shkencës, Teknologjisë dhe Inovacionit, Arbërie Nagavci, drejtorë komunalë e zyrtarë tjerë nga niveli qendror e lokal e bëmë përurimin e sallës së sporteve të Shkollës “Naim Frashëri” në qytet.
Nga sot nxënësit e kësaj Shkolle do ta kenë në shfrytëzim këtë objekt modern për zhvillimin e orëve të edukatës fizike dhe sportive, kjo falë bashkëpunimit të mirë që e kemi me Ministrinë e Arsimit.
Përveç kësaj salle, që është investim i MASHTI-t (rreth 400 mijë euro), është duke u ndërtuar edhe salla e sporteve në Shkollën “Enver Maloku” dhe në Shkollën “Ali Ajeti” në fshatin Sfeçël. Kurse, këtë vit kemi planifikuar ta ndërtojmë edhe sallën e sporteve në Shkollën ‘Shaban Shala”.
Si institucione lokale bashkë me nivelin qendror kemi investuar dhe po investojmë edhe në ndërtimin e objekteve të reja shkollore për të përmirësuar kushtet e mësimdhënies e mësimnxënies dhe për të pasur një proces arsimor sa më cilësor.
Nxënësit e stafi i Shkollës “Naim Frashëri” le ta gëzojnë këtë sallë moderne!
