Kryeministri Kurti premton përkrahje për fermerë

Kryeministri i Kosovës, Albin Kurti ka premtuar përkrahje për fermerë.

Më poshtë postimi i tij:

Përkrahja e shtetit për fermerë anekënd, cep më cep vendit, ka qenë prioritet i politikave tona. Mbi 300 milionë euro për afër 120 mijë përfitues në katër vjet.

Dje ishim për vizitë në fermën e deleve të familjes së Xhelal Shalakut në fshatin Dardhishtë, dhe në bletarinë e Hyd Kelmendit dhe Trimor Stullqakut në fshatin Hamidi. Përkrahjen për blegtorët e deleve dhe bletarët e kemi rritur në vazhdimësi. E gjetëm me 20 euro subvencion për kokë dele, ndërkaq në programin e sivjetmë do të jetë 30 euro – 50% më shumë. Në vitin 2020 subvencionimi për koshere ishte 15 euro, sivjet do të jetë 25 euro – mbi 66% më shumë. Për herë të parë në vend e rajon, po subvencionojmë bimët mjaltëdhënëse me 450 euro, duke krijuar mundësi për më shumë të hyra për fermerët nga prodhimi shtesë i mjaltit nga bimët dhe bletë më të shëndetshme.

Në dy vjet e fundit fondin blegtoral për gjedhe e kemi rritur për 11.3 milionë euro.

Me të njëjtin ritëm, duke synuar më shumë e më mirë, vijojmë edhe pas 9 shkurtit.