E rëndë: Djali e rrah nënën, e moshuara frikësohet të kthehet në shtëpi – dërgohet në strehimore

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një konflikt familjar ka ndodhur së fundmi edhe në Pejë, ku një i ri, përdorues i substancave narkotike, ka ushtruar dhunë ndaj nënës së tij 77-vjeçare.

Burimet e Gazetës Sinjali brenda Prokurorisë kanë bërë me dije se moshuara ka kërkuar ndihmë në Polici dhe ka deklaruar se ndihet e rrezikuar nga i biri.

Si rezultat i denoncimit, Policia ka ndërmarrë veprimet e nevojshme, por akoma nuk ka arritur ta arrestojë të dyshuarin.

Me urdhër të prokurorit, rasti tashmë është iniciuar.