Kërcënuan Lirim Mehmetajn, arrestohen dy persona

Krimet e Rënda kanë nisur hetimin ndaj dy personave të dyshuar për kërcënimin e gazetarit Lirim Mehmetaj, pas një denoncimi për kanosje. Policia është vënë në lëvizje dhe ka arritur t’i arrestojë dy të dyshuar, raporton ekskluzivisht Gazeta Sinjali.

Burimet brenda Prokurorisë kanë bërë me dije se gazetari Mehmetaj i ka raportuar rastet para dy ditësh, për komentet me përmbajtje kërcënuese, pas paraqitjeve të tij në debatet ku merr pjesë.

Si rezultat, Policia e Kosovës është vënë në lëvizje dhe ka arritur që gjatë ditës së sotme t’i identifikojë personat e dyshuar dhe të sigurojë prezencën e tyre.

Sinjali ka mësuar ekskluzivisht se të dyshuarit janë intervistuar dhe me urdhër të Prokurorit të Shtetit janë dërguar në mbajtje.

Ndaj tyre, është iniciuar hetimi në drejtim të veprës penale “Kanosja”.