39-vjeçari i shkon ish-gruas te puna dhe e rrah, ajo e denoncon në Polici

Numri i rasteve të dhunës ndaj vajzave e grave në Kosovë po vazhdon të jetë mjaft i madh dhe në shumicën e këtyre ngjarjeve të trishta, të dyshuar janë partnerët e tyre. Shumë gra vendosin t’i ndajnë rrugët me burrat abuzivë, por as në këtë formë nuk arrijnë të shpëtojnë nga problemet, raporton Gazeta Sinjali.

Sinjali mëson se në hall me ish bashkëshortin e saj është edhe një grua 32-vjeçare nga Fushë Kosova, e cila ka kërkuar ndihmën e Policisë gjatë ditës së djeshme.

Bazuar në informacionet e para, ish burri i saj i ka shkuar te vendi i saj i punës dhe ka ushtruar dhunë ndaj saj, duke e sulmuar me grushte.

Si pasojë e lëndimeve që ka pësuar, viktima ka marrë trajtim mjekësor dhe e ka raportuar rastin.

Si rezultat, Policia është vënë në lëvizje, por s’kanë arritur ta arrestojnë të dyshuarin, i cili ndodhet akoma në arrati.

Lidhur me rastin, Prokurori i Shtetit ka urdhëruar inicimin e hetimit dhe ndërmarrjen e veprimeve të nevojshme hetimore.