Kurti për mediat: Janë të parëndësishme

Derisa jashtë vendit e paraqet si të arritur të tij lirinë e medias në vend, gjatë fushatës nëpër qytete të ndryshme në Kosovë, kryeministri Albin Kurti në vazhdimësi po sulmon mediat.

Njëjtë veproi edhe të premten gjatë një tubimi zgjedhor në Kamenicë, ku sulmoi mediat që raportojnë për skandalet e qeverisë së tij.

Kurti u tha qytetarëve se mediat janë të parëndësishme.

“E, këto partitë opozitare me keqardhje e them se moti janë bërë si mallra që shiten e blihen, por kësaj radhe edhe iu ka skaduar afati. E tash, shumë njerëz, portale oligarkësh rrotull tyre, po na sulmojnë e po na akuzojnë, me shpifje nga më të ndryshmet, thjesht të dashur qytetarë, disa njerëz nuk po mund të pajtohen me faktin se nuk po ka kurrfarë rëndësie, ama bash kurrfarë rëndësie se çka thonë ata” – tha fillimisht ai.

“Sa më parë që e kuptojmë parëndësinë e vetës, i shtojnë rëndësi vetës për të ardhmen. Mirëpo është e qartë që sulmet e akuzat e tyre me përmbajtje shpifje janë dëshmi për neve, se ende nuk janë vetdijesuar e ndërgjegjësuar për parëndësinë e tyre” – shtoi kryetari i Vetëvendosjes, transmeton Nacionale.