4 mijë euro kësti i kredisë, 1300 euro pagë mujore

Një vit pasi e mori postin e Ministrit të Mjedisit, Planifikimit Hapësinor dhe Infrastrukturës, Liburn Aliu “u gozhdua” nga qytetarët për rritjen e pasurisë.

Pasuria totale e Liburn Aliut, nga viti 2011 deri në vitin 2024, u ngrit pasi erdhi në pushtet në vitin 2021 me mbi 223 mijë euro, raporton KIKS Kosova.

Blerjen e banesave në lagjen më luksoze në Prishtinë, ai e mohon që e mori me përfitimet që mund të vinë nga “karriga e një ministri”.

Për banesat të cilat s’e dinte sa e kishin çmimin e metrit katror, ministri Aliu ka të deklaruara dy blerje.

Një në emër të prindërve me shumën prej 87 mijë euro, dhe tjetrën të përbashkët, 161 mijë euro.

Bazuar në deklarimin e pasurisë të vitit 2023, ministri Liburn Aliu kishte njoftuar se obligime financiare ndaj bankave në bazë mujore kishte 4 mijë 39 euro, derisa të hyrat mujore po atë vit i kishte 1 mijë 388 euro.

Pra, për një muaj Aliu ka paguar 2 mijë 651 euro më shumë se sa të ardhurat e tij mujore.

Se si ka arritur ta përmbyllë 2023 ministri Aliu, të paguajë kredi tre herë më shumë se sa të ardhurat e tij mujore mbetet ta sqarojë në të ardhmen, si dhe Agjencisë për Parandalimin e Korrupsionit i mbetet të verifikojë nëse të dhënat e Aliut janë të sakta.

Megjithatë, ngriten pikëpyetje nëse Aliu kishte shfrytëzuar autoritetin e tij si ministër i “ministrisë së tenderëve”, për të marrë favore nga operatorët ekonomikë.

Apo faktin se si ka arritur t’i bindë bankat që t’i lëshojnë kredi tre herë më të madhe se sa rroga e tij, kur dihet se bankat nuk lejojnë që kësti i kredisë të jetë më shumë se sa 1/3 e pagës.

Rastësi apo jo, 2021-ta siç duket qe viti më me fat për Aliun, pasi që këtë vit shënoi rritje të të hyrave vjetore me 64 mijë e 184 euro.

E në 2021-ën, të hyrat vjetore iu shtuan edhe bashkshortes së ministrit, e cila numëron rreth 42 mijë 889 euro.

Aliu, i konsideruar si krahu i djathtë i kryeministrit Albin Kurti, ka mbetur jashtë listave zgjedhore.

Kjo për faktin se Kiks Kosova mëson se mbi të rëndojnë disa hetime penale për keqmenaxhim me tenderë në ministrinë e infrastrukturës. /Klankosova.tv