Zbulohet një laborator për falsifikimin e dokumenteve në Prishtinë
Përmes një komunikate të përbashkët Prokuroria Speciale dhe Policia e Kosovës kanë njoftuar se kanë zbuluar një laborator të sofistikuar për falsifikimin e dokumenteve.
Sipas komunikatës, në Prishtinë është zbuluar një shtëpi ë shërbente si laborator i sofistikuar për prodhimin e dokumenteve të falsifikuara, si pasaporta, karta identiteti dhe patentë shoferë.
Lidhur me rastin është arrestuar i dyshuari me inicialet F.K, ndaj të cilit është caktuar masa e paraburgimit në kohëzgjatje prej 30 ditëve.
Komunikata e plotë:
Policia e Kosovës më 24 janar 2025 ndaloi një automjet në Prishtinë, ku gjeti dokumente të zbrazëta të shteteve të ndryshme të botës. Shoferi me inicialet (F.K.) u arrestua dhe i është caktuar masa e paraburgimit prej 30 ditësh. Pas hetimeve intenzive, u zbulua një shtëpi në Prishtinë që shërbente si laborator i sofistikuar për prodhimin e dokumenteve të falsifikuara, si pasaporta, karta identiteti dhe patentë shoferë. Në bastisje u sekuestruan dëshmi relevante, makina laserike, printerë, mbi 20,000 mikroçipa dhe mijëra dokumente nga 51 shtete të ndryshme të botës. Ky rast po hetohet si “Falsifikim i dokumenteve” dhe “Krim i organizuar” nga Prokuroria Speciale. Policia e Kosovës mbetet e angazhuar në luftimin e krimit të organizuar.
