Vdes epidemiologu i parë shqiptar i Kosovës, Prof. Dr. Isuf Dedushaj

Epidemiologu i njohur, i pari nga shqiptarët e Kosovës, Isuf Dedushaj, ka vdekur në moshën 73 vjeçare.

Lajmin për vdekjen e tij e ka bërë të ditur familja e tij.

Vajza e tij, Vjollca, ia kushtoi këto vargje babait të saj tashmë të ndjerë:

“Dielli im që më dha jetë perëndoi! Sot me 1.2.2025 në moshën 73 vjeçare pushoi së rrahuri zemra e njeriut tonë më të dashur, Prof Dr Isuf Dedushaj. Babë të falemnderit për krejt të mirat që ja ofrove të gjithëve, por sidomos për jetën e nderin që na dhurove ne”.

“Ke me jetu dhe me shumë gjenerata që do vinë pas. Lum si ti për shpirtin tënd o malsori ynë i pashoq, ti shkove vetëm fizikisht, ke me jetu gjatë me veprat e mira që bëre”.

“Deri në takimin tonë të radhës, do të përqafoj shpirtin tënd çdo ditë”.

“I miri im, fryma ime, BABI im pusho në PAQE e Shpirti yt dritë pastë, siç pati në këtë botë”, shkroi e bija e tij.

Ndërkaq, për ceremoninë dhe ditën e varrimit, familja tha se do të njoftohet opinioni me kohë.

Kush ishte Isuf Dedushaj?

Prof. Dr. Isuf Dedushaj ka qenë mjek, epidemiolog, profesor universitar dhe doktor i shkencave të mjekësisë nga Vuthaj, në Mal të Zi.

Shkollën fillore e mbaroi në Vuthaj dhe Guci. Gjimnazin e kreu në Pejë, kurse Fakultetin e Mjekësisë në Prishtinë në mars të vitit 1976.

Fillimisht punoi në Shtëpinë e Shëndetit në Drenas të Drenicës. Në vitin 1976 punësohet në Entin Krahinor për Mbrojtje Shëndetësore ku zgjidhet bashkëpunëtor për lëndën Mjekësi Sociale. Përfundon specializimin për epidemiologji më 20 maj të vitit 1980, duke u bërë kështu epidemiologu i parë shqiptar i Kosovës, sipas biografisë së publikuar nga Kolegji i Kirurgëve të Kosovës.

Studimet pasuniversitare i mbaroi në Fakultetin e Mjekësisë në Universitetin e Sarajevës në Bosnje, ku edhe magjistroi në nëntor të vitit 1983.

Dr. Isuf Dedushaj me 27 nëntor të vitit 1986 në Fakultetin e Mjekësisë mbrojti tezën e doktoratës. Gjatë vitit 1986/1987 përfundoi subspecializimin në imunologji pranë Fakultetit të Mjekësisë në Universitetin e Zagrebit në Kroaci. Punoi në Entin për Mbrojtjen Shëndetësore të Kosovës prej vitit 1976 deri në vitin 1990.

Në Fakultetin e Mjekësisë në Prishtinë, ka qenë edhe prodekan dhe dekan. Prof. Dedushaj ka qenë anëtar i Redaksisë së Revistës Shkencore “Praxis Medica” të Kosovës. Ka publikuar 112 punime shkencore në Kosovë dhe jashtë saj. Është autor i disa monografive shkencore dhe teksteve universitare. /Klankosova.tv