Zyrtari policor tregohet i pakujdesshëm në Prishtinë

Pothuajse çdo ditë shkaktohen dhjetëra aksidente në trafik dhe në shumicën e rasteve si pasojë e pakujdesisë së shoferëve gjatë vozitjes. Jo rrallëherë, në raste të tilla përfshihen edhe zyrtarët policorë, siç ka ndodhur para mbrëmë në rrugën “Nazim Gafurri” në Prishtinë, raporton Gazeta Sinjali.

Siç merr vesh Sinjali, një zyrtar policor derisa ishte në lëvizje me veturën zyrtare ka shkaktuar aksident trafiku, duke e goditur një motoçikletë.

Si pasojë e përplasjes, ka pësuar lëndime drejtuesja e motoçikletës, një vajzë 16-vjeçare – e cila ka marrë trajtim mjekësor, por fatmirësisht nuk ka pësuar lëndime të rënda.

Bazuar në informacionet e para, aksidenti është shkaktuar si pasojë e veprimit të tij, kthimit të pasigurt që shkaktoi më pas goditjen.

Tashmë janë ndërmarrë të gjitha veprimet e nevojshme lidhur me rastin, ndërsa është vënë në dijeni edhe Inspektorati Policor i Kosovës.