Martin Berishaj mori votat pa praninë e vëzhguesve, KQZ pritet t’i anulojë

Ndërhyrja e ambasadorit të Kosovës në Kroaci, Martin Berishaj në procesin zgjedhor të diasporës tashmë është konfirmuar edhe nga anëtarët e Komisionit Qendror Zgjedhor.

Anëtari i KQZ-së, Arianit Elshani ka thënë për Gazetën Infokus se KQZ-ja ka kërkuar sqarime në lidhje me këtë çështje nga ambasadori Berishaj. Ai po ashtu ka deklaruar se votat të cilat janë marrë nuk do të shqyrtohen nga KQZ-ja.

“Sipas informacioneve që mora nga KQZ-ja, është e vërtet që ambasadori Berishaj i ka marrë votat nga posta pa i njoftuar anëtarët e KQZ-së. KQZ-ja ka kërkuar sqarim prej ambasadorit Berishaj meqenëse i ka dërguar votat pa praninë e vëzhguesve të partive politike dhe të njëjtat nuk do të shqyrtohen nga Komisioni Qendror i Zgjedhjeve. Pra zarfet që janë tërhequr nuk do të shqyrtohen nga KQZ-ja. Do të anulohen ”, ka thënë Elshani.

Elshani këtë e ka quajtur ndërhyrje të rëndë e skandaloze në procesin zgjedhor.

Ndërsa anëtari tjetër i KQZ-së, Ibrahim Selmonaj ka thënë po ashtu se kanë informacione se ambasadori Berishaj ka ndërhyrë duke marrë fletëvotimet.

“Në fakt nuk kemi ndonjë informacion të konfirmuar për këtë çështje po presim një raport zyrtar të shërbimit të votuesve jashtë vendit dhe nëpërmes kanaleve të ndryshme kemi një informatë që ka ndodhë mirëpo brenda KQZ-së ende nuk kemi ndonjë informatë zyrtare. KQZ-ja do të marrë një vendim të bazuar në procedurat që i ka. KQZ-ja do të marrë një vendim serioz ose për anulimin e fletëvotimeve ose një vendim të bazuar në ligjet dhe procedurat”, ka thënë Selmonaj.

E në lidhje me raportimin e Infokusit ka reaguar edhe KQZ-ja. Ndonëse redaksisë së Infokusit nuk i ka hapur telefonin, zëdhënësi Valmir Elezi ka folur për Gazetën Express.

Ai ka thënë se do të vlerësohet nëse tërheqja e pakove me fletëvotime nga kutia postare në Zagreb është bërë sipas akteve nënligjore dhe se KQZ do të marrë vendim meritor.

“Lidhur me lajmin që po qarkullon për tërheqjen e pakove me fletëvotime nga kutia postare e KQZ-së në Zagreb (Kroaci), sqarojmë se do të vlerësohet nëse tërheqja e pakove me fletëvotime nga kjo kuti postare është bërë sipas akteve nënligjore dhe KQZ do të marrë vendim meritor”, ka thënë Elezi./Gazeta Infokus