Tentim dhünim në Fushë Kosovë: 14-vjeçarja rrëfen në Polici

Të miturat janë viktimat më të shpeshta të ngacmimeve, sulmeve seksuale e dhunimeve në Kosovë. Raste të tilla dhe mjaft të trishta po tronditin familjet e tyre, që kërkojnë ndihmë dhe mbrojtje nga institucionet. Të dyshuarit kryesisht janë të moshës madhore, të cilët edhe krijojnë raporte të afërta me të miturat, me qëllime seksuale, raporton Gazeta Sinjali.

Një rast i tillë u zbulua së fundmi në Fushë Kosovë dhe viktima është një vajzë 14 vjeçare, e cila bashkë me prindërit e saj ia mësyu dje Policisë.

Burimet e Gazetës Sinjali kanë bërë me dije se e mitura ka rrëfyer se ka qëndruar bashkë me një person në banesën e familjes, me të cilin kanë pasur raport intim para rreth 1 jave.

Pasi familja zbuloi rastin, kërkoi ndihmë në Polici, me ç’rast u identifikua personi i dyshuar.

Si rezultat i denoncimit, zyrtarët policorë janë vënë në lëvizje dhe kanë arrestuar e shoqëruar në stacion personin e dyshuar.

Me urdhër të prokurorit, është iniciuar hetimi nën dyshimet për veprën penale ‘Dhunim në tentativë’, ndërsa i dyshuari është ndaluar për 48 orë.