Ndërron jetë Valbona Mehmeti

U nda sot nga jeta zyrtarja e Federatës së Hendbollit, Valbona Mehmeti.

Lajmi u bë i ditur nga FHK-ja përmes një njoftimi në Facebook.

Kontributi i saj në federatë u vlerësua lart.

Në njoftim tutje thuhet se ajo ishte përballur me një sëmundje të rëndë, për shumë vjet.

Varrimi i të ndjerës bëhet sot në orën 14:45, në varrezat e qytetit në Prishtinë.

“Kontributi i saj për mbarëvajtjen e punëve në federatën tonë, e rrjedhimisht edhe në hendbollin kosovar, është i çmueshëm. E ka karakterizuar raporti i shkëlqyer me të gjithë, komunikimi shembullor me drejtues klubesh, punëtorë të hendbollit e hendbollistë dhe përkushtimi për të shërbyer për rritjen e vazhdueshme të imazhit të Federatës së Hendbollit të Kosovës dhe ruajtjen e aseteve të saj. Për shumë vjet e ndjera Valbonë është përballur me një sëmundje të rëndë. Stafi tjetër i Federatës së Hendbollit të Kosovës i ka qëndruar vazhdimisht pranë deri në ditët e fundit të jetës”, thuhet në njoftim transmeton Klankosova.tv

Me këtë rast, kryetari Edin Kolgeci, i shprehu ngushëllime familjes së të ndjerës.

“Me pikëllim pritëm lajmin për ndarjen nga jeta të koleges sonë të dashur, Valbona Mehmeti. Ajo ka shërbyer për Federatën tonë për periudhë të gjatë, ndërsa kontributi i saj është i tejçmuar në familjen kosovare të hendbollit. Në emër të komunitetit kosovar të hendbollit dhe sidomos të stafit të FHK-së, i shpreh ngushëllimet më të sinqerta familjes së nderuar Mehmeti”, shkruan në telegramin e ngushëllimit.