Komuna e Podujevës subvencionon shpenzimet e varrimit me 250 euro

Kryetari i Komunës së Podujevës, Shpejtim Bulliqi, ka nënshkruar një marrëveshje mirëkuptimi me Kryetarin e Këshillit të Bashkësisë Islame në Podujevë, Mensur Hoti, për subvencionimin e shpenzimeve të varrimit në territorin e komunës.

Sipas kësaj marrëveshjeje, Komuna e Podujevës do të mbulojë shpenzimet e varrimit në shumën prej 250 euro, ndërsa KBI do të kryejë shërbimet e varrimit sipas rregullave dhe traditave përkatëse. Ky veprim ka për qëllim që institucionet komunale t’u qëndrojnë pranë familjeve në momentet e dhimbjes kur humbin më të dashurit e tyre.

Marrëveshja do të zbatohet nga janari 2025 deri më 31 dhjetor 2026 dhe është vazhdimësi e marrëveshjeve të mëparshme, por me një shumë më të lartë financiare sesa në vitet e kaluara.