Numërimi i votave për deputetë në Fushë-Kosovë do të zgjasë “deri në 10 ditë”

Dhjetë ditë, të paktën, nuk do të numërohen votat në qendrën në Fushë-Kosovë shkaku i vonesave dhe problemeve me sistemin softuerik.

Puna në numërimin e votave në Fushë-Kosovë ka nisur me dy ditë vonesë, ndërkaq, rënia e sistemit të enjten ka tollovitur edhe më shumë procesin e numërimit, të cilit, që prej të dielës së 9 shkurtit kur janë mbajtur zgjedhjet i ka humbur kredibiliteti shkaku i problemeve të njëpasnjëshme.

Të premten, numërimi i votave për kandidatët për deputetë ka filluar përsëri dhe nga 61 kuti sa janë në këtë qendër, janë numëruar vetëm 15, raporton Paparaci.

Vëzhguesit në kushte anonimiteti kanë thënë se në bazë të numërimit që është duke u bërë deri më tani, procesi do të zgjasë për të paktën dhjetë ditë. Fajin për këto vonesa ia kanë lënë problemeve me sistem.

“Kur kemi përfunduar numërimin e një kutie, në hapësirën për kandidatët dilte numri 0 edhe pse kanë qenë të numëruara votat”, kanë thënë vëzhguesit.

Ata gjithashtu kanë shtuar se krejt procesi i numërimit të votave në Fushë-Kosovë ka filluar me dy ditë vonesë. Ata arsyet nuk i kanë ditur.

“Kemi filluar me dy ditë vonesë sesa është dashur, pastaj të enjten ka rënë sistemi në numërimin e kandidatëve”, ka thënë këta vëzhgues.

“Janë duke u numëruar shumë pak kuti. Po llogaritet që numërimi të zgjasë 10 ditë”, kanë thënë ata.

Vonesat në numërim i ka konfirmuar edhe Eugen Cakolli nga Demokracia në Veprim.
Të mërkurën në emisionin “Rubikon” të Klan Kosovës, Cakolli ka përmendur disa arsye për këto vonesa.

“Tempoja e punës është e ngadalshme nga ora 16 deri në 12 të natës, në 12 tavolina të votimit në Prishtinë janë numëruar vetëm 10 kuti”, ka thënë Cakolli.

“Vetëm në Prishtinë janë mbi 220 vendvotime, mund të na duhen të paktën edhe dy javë, pa llogaritur vendimet potenciale të PZAP-së që janë të mundshme për shkak tëdallimeve në vota, për shkak të rinumërimit të tyre”, ka theksuar ai.

Sipas tij këto vonesa po ndodhin edhe shkaku i ndërhyrjeve nga vëzhguesit, duke përmendur rastin e së martës kur një vëzhgues i VV-së insistonte se një votë ishte e pavlefshme, ani pse ajo ishte e vlefshme.

“Procedura e verifikimit dhe lejimi i ndërhyrjeve nga vëzhguesve, të njëjtit janë në presion dhe detyrohen t’i rinumërojnë votat”, ka thënë ai.