Pamje nga zjarri në Brezovicë

Një incident i rëndë zjarri ka ndodhur mëngjesin e sotëm në Brezovicë, ku hoteli “Pine” është përfshirë nga flakët. Si pasojë e zjarrit janë shkaktuar dëme të konsiderueshme material, ndërsa fatmirëisht nuk është raportuar për persona të lënduar, raporton Gazeta Sinjali.

Me të marrë lajmin, ekipet e zjarrfikësve kanë dalë në vendin e ngjarjes dhe kanë intervenuar për lokalizimin dhe shuarjen e zjarrit.

Sinjalizuesit kanë dërguar pamje nga vendi i ngjarjes, ku shihet se flakët e zjarrit në hotel po vazhdojnë, ndërsa shihen edhe zjarrfikësit duke kryer punën e tyre.

Përpos zjarrfikësve, në vendin e ngjarjes kanë dalë edhe njësitet policore, të cilët kanë bërë sigurimin e zonës përrreth.

Sipas Sinjalizuesve që ndodhen në vendin e ngjarjes, Policia ka bllokuar rrugët për shkaqe sigurie, pasi dyshohet se ka bombola të gazit në bodrumin e hotelit.

Hetimet në lidhje me këtë rast tashmë kanë filluar, për zbardhjen dhe përcaktimin e detajeve dhe rrethanave të ngjarjes.

Lajmin për Sinjalin e kanë konfirmuar edhe nga Policia Rajonale në Ferizaj.