Ngacmoi 11 vjeçaren, arrestohet pronari i marketit

Numri i rasteve të ngacmimeve, sulmeve e dhunës seksuale në vendin tonë ka marrë përmasa shqetësuese. Të dyshuarit, që në shumicën e rasteve janë persona të moshës madhore, shfrytëzojnë çfarëdo forme që t’i keqpërdorin vajzat dhe gratë. Për një rast të tillë që dyshohet se ka ndodhur së fundmi në Fushë Kosovë, një person është arrestuar, raporton Gazeta Sinjali.

Rasti dyshohet se ka ndodhur në marketin ‘Xhela’ në rrugën “Abedin Sogojeva” në Fushë Kosovë dhe i arrestuari është pronari marketit.

Sinjali ka mësuar ekskluzivisht se pronari i marketit që po dyshohet për ngacmimin seksual të një vajze rreth 11-vjeçare është Kushtrim Tahiri.

Lidhur me këtë rast është arrestuar edhe babai i të miturës, i cili po dyshohet se e ka sulmuar të dyshuarin Tahiri, në shenjë revolte për rastin e ngacmimit.

Bazuar në informacionet e para, vajza ishte futur në market për të blerë diçka dhe i dyshuari fillimisht i ka shkuar nga pas, më pas e ka prekur në faqe dhe ka tentuar ta puth po ashtu në faqe.

Pamjet e këtij rasti tashmë janë siguruar nga Policia, ku shihet fillimisht ngjarja që ka ndodhur në market e më pas edhe sulmi nga babai i viktimës, i cili e godet pronarin e marketit.

Ndaj të dyshuarit Tahiri është iniciuar rasti për veprën penale “Ngacmim seksual” dhe është dërguar në mbajtje, ndërsa babai i vajzës është ndaluar për veprën “Sulmi”.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.