Thaçit i refuzohet edhe kërkesa e dytë për ta vizituar babain në Kosovë

Hashim Thaçit iu është refuzuar kërkesa e dytë për vizitë humanitare në Kosovë nga gjyqtarja e procedurës paraprake, Marjorie Masslot në rastin kundër administrimit të drejtësisë.

Thaçi kishte kërkuar përmes mbrojtjes së tij lirimin e tij të përkohshëm në Kosovë për një ditë në mënyrë që të iu mundësohet ta vizitojë babain e tij.

Sipas mbrojtjes, babai i Thaçit ka pësuar një keqësim të gjendjes shëndetësore që nga vendimi i parë për refuzimin e vizitës në Kosovë në janar të këtij viti.

Vendimi thotë se mbrojtja ka parashtruar se babai i Thaçit është shtruar në spital në shkurt të 2025-ës.

“Ndërkohë që babai i tij është shpërndarë nga spitali, ai është pranuar për shërbim mjekësor [REDAKTUAR] dhe është vërejtur [REDAKTUAR] gjatë shtrimit në spital.

Mbrojtja thekson se babai i Z. Thaçi ka pasur [REDAKTUAR], që është [REDAKTUAR] për shkak të moshës dhe gjendjes së tij shëndetësore të përgjithshme. Gjithashtu, mjeku i tij trajtues ka vlerësuar se [REDAKTUAR]. Z. Thaçi është i shqetësuar se gjendja e babait të tij mund të [REDAKTUAR]”, thuhet në vendim.

Sipas vendimit, mbrojtja ka propozuar edhe vendin e vizitës e po ashtu se kush mund të jetë shoqërues, informata këto të cilat janë të redaktuara.

“Mbrojtja kërkon që vizita të bëhet në [REDAKTUAR] dhe të jetë e shoqëruar nga [REDAKTUAR]”, thuhet tutje në vendim.

Veç kësaj, aty thuhet se mbrojtja kundërshton faktin se Thaçi paraqet rrezik të arratisjes megjithatë ata pretendojnë se ky konstatim i gjyqtares së procedurës paraprake mund të zbutet përmes masave dhe kushteve të njëjta që ishin vendosur në dy rastet e mëparshme kur ai ishte liruar përkohësisht për arsye humanitare.

Ndërsa, ZPS-ja ishte përgjigjur në këtë kërkesë të mbrojtjes duke thënë se babai i Thaçit nuk është i shtruar në spital por në një vend, informaiconi për të cilin është i redaktuar për publikun.

ZPS-ja pretendon se liria e kërkuar nga Thaçi paraqet rrezik për pengim dhe ndërhyrje në drejtësi ashtu sic e kishte theksuar edhe në kërkesën e parë të Thaçit për këtë vit lidhur me lirimin e përkoshhëm.

“ZPS pohon se nëse gjyqtari i procedurës paraprake ka qëllim ta miratojë Kërkesën e Dytë për Lirim, çdo vizitë e autorizuar duhet të jetë plotësisht e shoqëruar dhe të jetë e kufizuar në një (1) ditë vetëm, dhe të gjitha kushtet që lidhen me vizitat e mëparshme duhet të aplikohen”, thuhet në vendim.

Kurse, Administratorja ka theksuar se babai i Thaçit nuk është aktualisht në spital dhe se Thaçi ka mundësi që të qendrojë në kontakt të ngushtë me të përmes videotelefonatave.

Ndërsa në vendimin e saj, gjyqtarja ka kujtuar se liria e përkohshme për arsye humanitare është masë përjashtuese.

“Disa faktorë mund të jenë të rëndësishëm për këtë vlerësim, si faza e procedurës, natyra e krimeve, karakteri i të akuzuarit, graviteti i sëmundjes së të afërmit, lidhja familjare dhe mundësia e pushimit të shoqëruar. Vizita e një të afërmi në gjendje kritike është pranuar si një arsye humanitare që justifikon lirim të përkohshëm në rrethana të caktuara”, thuhet në vendim.

Vendimi vijon duke treguar se gjyqtarja është e vetëdijshme që babai i Thaçit është në moshtë të avancuar por që tani për tani nuk ka ndonjë informacion që tregojnë se gjendja e tij shendetesore është kritike.

“Gjykatësi është i vetëdijshëm se babai i Z. Thaçi është në moshë të avancuar dhe ka pasur [REDAKTUAR].
Gjykatësi gjithashtu shqyrton faktin se babai i Z. Thaçi ka qenë [REDAKTUAR] deri në [REDAKTUAR] shkurt 2025. Gjykatësi thekson gjithashtu që, ndonëse gjendja shëndetësore e tij ka pasur përkeqësim, nuk ka asnjë informacion që sugjeron se gjendja e tij është një krizë akute ose kërcënuese për jetën”, thuhet në vendim.

Si rrjedhojë, gjyqtarja ka refuzuar kërkesën e Thacit për lirim të përkohshëm në Kosovë për ta vizituar babain e tij.

Thaçi kishte bërë kërkesë me 31 janar 2025 nga gjyqtarët në të dy rastet e tij (atë për krime lufte dhe atë për administrim të drejtësisë) që ta lirojnë për vizitë humanitare në Kosovë.

Sipas vendimit të 31 janarit 2025, mbrojtja e Thaçit kishte paraqitur se gjendja shëndetësore e babait të klientit të tij përben rrethana urgjente dhe të jashtëzakonshme që justifikojnë lirimin e Thaçit për arsye humanitare. Në të dy rastet, kërkesa e tij ishte refuzuar.

Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte si dhe së fundi iu është ngritur një aktakuzë kundër administrimit të drejtësisë.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Ndërsa, lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt sot (9 dhjetor).

Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe Vllaznim Kryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.

Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.