Motra ushtron dhunë ndaj motrës për pronë

Mosmarrëveshjet për prona po vazhdojnë të shkaktojnë përleshje e telashe të shumta. Të tilla raste zakonisht nisin me zënka e konflikte verbale, e më pas përfundojnë si raste në Polici, raporton Gazeta Sinjali.

Sinjali ka mësuar se kështu dyshohet se ndodhi së fundmi në Pejë, ku dy anëtarë të një familje janë futur në sherr me njëri-tjetrin për shkak të pronës.

Burimet brenda Prokurorisë kanë bërë me dije këtë herë janë përfshirë dy motra, ku njëra prej tyre dyshohet se ka ushtruar presion ndaj motrës tjetër, për shkak të një prone të trashëguar nga prindi i tyre.

Konflikti verbal eskaloi në ofendime e dhunë psikike, e madje e dyshuara tentoi edhe ta sulmojë motrën e saj, thonë tutje të njëjtat burime.

Palët janë shoqëruar në stacion policor, ku kanë dhënë deklaratat e tyre lidhur me rastin.

Më urdhër të Prokurorit të Shtetit, rasti ndaj të dyshuarës është iniciuar për veprën penale ‘Dhuna në familje’.