LDK-ja as me VV-në as me PDK-në, Abdixhiku thotë e para ta formojë qeverinë

Ka përfunduar pas pesë orëve takimi i Kryesisë së Lidhjes Demokratike të Kosovës të hënën, takim që u thirr për të diskutuar pozicionin e partisë pas zgjedhjeve parlamentare.

Partia që doli e treta në zgjedhjet e 9 shkurtit diskutoi mbi rezultatin zgjedhor, performancën nëpër degë në Kosovë dhe në mërgatë si dhe pozicioni pas rezultatit final.

Kryetari i Lidhjes Demokratike të Kosovës, Lumir Abdixhiku, ka përjashtuar mundësinë e bashkëpunimit të LDK-së me Lëvizjen Vetëvendosje.

Ai ka thënë se LDK-ja s’ka pasur asnjë takim me asnjë parti politike pas zgjedhjeve parlamentare të 9 shkurtit.

“Nuk kemi pasur asnjë takim me asnjë prej partive politike në Kosovë, sidomos me partinë në pushtet. Nuk duam, nuk kemi dhe nuk punojmë për bashkëpunim me ta (LVV)”, ka thënë ai në konferencën pas mbledhjes së Kryesisë së LDK-së.

Abdixhiku ka thënë se LDK-ja s’do të jetë pjesë e asnjë qeverie pa pozitën e kryeministrit. Sipas tij, LDK-ja nuk synon dhe s’punon për “qeveri afatshkurtër”.

Kryetari i LDK-së ka shtuar se i takon partisë fituese të zgjedhjeve që të nisë afatin për të caktuar emrin e mandatarit dhe kryetarin e Kuvendit.

“Presim veprimet e të parit. Pas këtyre veprimeve do ta keni edhe pozicionin e LDK-së”, ka shtuar ai.