18-vjeçari nuk iu ndal policisë

Një 18-vjeçar është arrestuar në Ferizaj pasi nuk iu bind urdhrit të policisë për t’u ndalur dhe më pas shkaktoi një aksident.

Sipas Policisë Rajonale të Ferizajt, ngjarja ndodhi më 14 mars 2025, rreth orës 13:28, në rrugën “Driton Islami”, kur njësia e komunikacionit rrugor i dha shenjë për ndalim një veture të tipit Mercedes me targa vendore. Megjithatë, shoferi nuk u ndal dhe vazhdoi lëvizjen me shpejtësi të lartë.

Gjatë ndjekjes nga policia, në rrugën “Vëllezërit Gërvalla”, i dyshuari humbi kontrollin dhe goditi objektin e një furre buke, duke shkaktuar aksident.

Pas arrestimit, 18-vjeçari M. Sh. u shoqërua në stacionin policor dhe ndaj tij u iniciua procedura për veprën penale “Shkaktim i rrezikut të përgjithshëm”. Po ashtu, ai u gjobit për mosrespektim të urdhrit të policisë dhe për drejtim të automjetit pa patentë shoferi.

Policia e Ferizajt ka theksuar përkushtimin e saj për zbatimin e ligjit dhe garantimin e sigurisë publike.