Arrestohet kryeshefi i KRU “Gjakova”, Hasan Krasniqi

Kryeshefi i Kompanisë Rajonale të Ujësjellësit “Gjakova”, Hasan Krasniqi, sot ka përfunduar në pranga gjatë një operacioni të realizuar nga Policia.

Hasani, që kishte qenë kandidat i VV-së për asamblist, dyshohet për veprën penale “Keqpërdorim i pozitës apo autoritetit zyrtar”.

Lajmi është konfirmuar nga Prokuroria Speciale e Kosovës.

“Prokuroria Speciale e Republikës së Kosovës në bashkëpunim me Drejtorinë për Hetimin e Krimeve Ekonomike dhe Korrupsionit, përkatësisht Njësinë Rajonale për Hetimin e Krimeve Ekonomike e Korrupsionit në Gjakovë, kanë realizuar sot një operacion policor në Gjakovë.

Operacioni policor ka rezultuar me arrestimin e një personi H.K.,  të dyshuar për veprën penale “Keqpërdorim i pozitës apo autoritetit zyrtar” nga neni 414 i KPRK-së, i cili  me vendim të prokurorit nga PSRK është ndaluar për 48 orë”, shkruhet në komunikatën e Prokurorisë.

Po ashtu, Prokuroria ka bërë të ditur gjatë ditës së sotme është bastisur edhe shtëpia e Krasniqit dhe zyra e tij në KRU Gjakova, ku janë siguruar dëshmi-prova materiale që ndërlidhen me rastin, si dhe janë sekuestruar:

-Një (1) Telefon mobil Samsung Galaxy S22,

-Para 22.205,00 Euro,

-Barka Ranier Wit,

-Dy kontrata qe ndërlidhen me rastin.

Prokurori i rastit brenda afatit ligjor do të vendosë për masën e sigurisë së pranisë së të pandehurit në procedurë.