LDK: Presionet e VV-së për të manipuluar rezultatet zgjedhore duhet të marrin fund

Lidhja Demokratike e Kosovës përmes një komunikate të lëshuar për media ka njoftuar se dënon ashpër çdo formë të presionit të ushtruar ndaj Panelit Zgjedhor për Ankesa dhe Parashtresa (PZAP), duke e konsideruar këtë si një ndërhyrje të papranueshme dhe të rrezikshme në një proces që duhet të mbetet tërësisht i pavarur dhe i paanshëm, raporton Gazeta Sinjali.

Në reagim thuhet se LDK pret që normat demokratike dhe vullneti i qytetarëve të shprehur përmes votës së lirë të respektohen plotësisht dhe pa asnjë kusht.

“Nëse vullneti i qytetarëve do të përmbyset përmes presioneve të orkestruara, Lidhja Demokratike e Kosovës do të ndërmarrë të gjitha hapat e nevojshëm, duke përdorur të gjitha mjetet demokratike dhe institucionale, për të mbrojtur të drejtën legjitime të votuesve tanë. Ne nuk do të lejojmë që zgjedhjet të shndërrohen në një farsë të dirigjuar nga një pushtet që synon të deformojë rezultatin zgjedhor përmes trysnisë dhe manipulimit.

Presionet e Lëvizjes Vetëvendosje për të ndikuar në vendimmarrjen e institucioneve të pavarura dhe për të manipuluar rezultatet zgjedhore duhet të marrin fund njëherë e përgjithmonë. LDK do të vazhdojë të mbrojë pa kompromis integritetin e procesit zgjedhor, duke u angazhuar për një Kosovë ku zgjedhjet mbeten një shprehje e lirë dhe e pacenuar e vullnetit qytetar”, thuhet në komunikatën e LDK-së.