Deputeti llapjan i VV-së del pro tërheqjes së Trustit

Lejimi i tërheqjes së një pjese të parave nga Trusti, është bërë përsëri temë diskutimi, për shkak të krizës ekonomike në të cilën po kalon Kosova. Opozita është ajo që kaherë e ka shtyrë përpara këtë çështje, duke kërkuar edhe nga pozita përkrahje që qytetarëve tu lejohet që t’i tërheqin paratë nga Trusti, shkruan lajmi.net.

Kësisoj, për dallim nga shumica e pozitës, pro kësaj ideje ka dalë deputeti i Lëvizjes Vetëvendosje, Fatmir Humolli.

Humolli, për lajmi.net e ka konfirmuar se në momentin që kjo çështje do të shtrohet për diskutim dhe vendimmarrje në Kuvend, ai do të votojë pro lejimit të tërheqjes së një përqindje të parave nga Trusti.

Duhet kujtuar se para disa muajsh Projektligji për Trustin ka dështuar të marrë përkrahjen e shumicës parlamentare, ku mazhoranca votojë kundër tij.

Megjithatë, nga qytetarët është organizuar një peticion, duke i kërkuar kuvendit që ky Projektligj të aprovohet dhe kësisoj qytetarëve të u lejohet tërheqja e mjeteve të kursyera nga Trusti, peticion i cili ka arritur mbi 20 mijë nënshkrime.