Futet në market si kliente, del si hajdute – e dyshuara vjedhë detergjent, çokollata e shampon

Rritja e rasteve të vjedhjeve dhe grabitjeve në banesa e shtëpi, lokale e biznese të ndryshme e gjithandej në hapësirat publike, ka ngritur shqetësime serioze mbi sigurinë publike. Krime të tilla, po shkaktojnë humbje, por edhe pasiguri – sidomos në markete, raporton Gazeta Sinjali.

Një rast i tillë ka ndodhur mëngjesin e 10 prillit në veri të Mitrovicës, ku një grua e panjohur ka shfrytëzuar rastin në një market për të marrë një sasi të konsiderueshme të produkteve – pa paguar asgjë.

Burimet e Gazetës Sinjali bëjnë me dije se ngjarja ka ndodhur në rrugën “Knjaz Millosh”, në marketin “Emona”, ku e dyshuara ka vepruar si një blerëse e zakonshme, por pas pak ka dalë nga dyqani me çantën plot artikuj, si “Ariel”, çokollata “Dubai”, shampon për flokë, aromë për rroba dhe artikuj të tjerë – vlera e të cilëve llogaritet të jetë nga 80 deri në 100 euro.

Deri më tani, e dyshuara për këtë plaçkitje, nuk është identifikuar, por e gjithë kjo ngjarje është kapur nga kamerat e sigurisë së marketit, të cilat tashmë janë në duart e Policisë.

Lidhur me rastin është njoftuar edhe Prokurori, i cili rastin e ka iniciuar si “Vjedhje”, ndërkohë që hetuesit janë në kërkim të autores.