Dalin para gjykate tiktokeri me shokë

Influenceri Arizon Rrustemaj bashkë me Agon Golajn, Leoment Çekun dhe Edison Fazliun po akuzohen nga Prokuroria Themelore në Pejë për dhunimin seksual të një 14-vjeçareje përgjatë vitit 2021. Ndërkaq, Petrit Llugaliu po akuzohet për degradim të integritetit seksual. Përgjatë ditës së enjte kanë dalë para gjykatës në seanca fillestare në Gjykatën Themelore në Pejë.

Insajderi merr vesh se të akuzuarit do të deklarojnë fajësinë apo pafajësinë e tyre lidhur me rastin.

Të apostrofuarit po akuzohen për dhunim dhe degradim të integritetit seksual një të miture përgjatë vitit 2021.

Në aktakuzën e Prokurorisë, të cilën e ka parë Insajderi, tiktokeri Rrustemaj, Golaj, Çeku dhe Fazliu akuzohen se në periudha të ndryshme kanë kryer marrëdhënie seksuale pa pëlqimin e viktimës së mitur.

“Gjatë muajit Gusht 2021 pikërisht në villat … në Pejë, me detyrim ka kryer akt seksual pa pëlqimin e viktimës se mitur e moshës katërmbëdhjetë (14) vjeçare, në atë mënyrë që pasi i pandehuri njoftohet më viktimën përmes rrjeteve sociale, arrin ta bindë të njëjtën që të dalin së bashku, ashtu që pasi e takon viktimën tek …, e merr të njëjtën më automjetin e tij dhe e dërgon tek villat e lartcekura ku e kryen aktin”, thuhet në akuzat ndaj tiktokterit pejan.

Po ashtu, Agon Golaj akuzohet se në maj të vitit 2021 e ka marrë viktimën, e ka çuar në villë dhe ka kryer akt seksual pa pëlqimin e saj. Me viktimën, sipas, prokurorisë është njohur në rrjetin social “Snapchat”.

Ndërkaq në qershor të 2021-ës, Leoment Çeku akuzohet po ashtu se ka kryer akt seksual me të miturën pa pëlqimin e saj, duke e dërguar atë në villa.

“Gjatë muajit Korrik të vitit 2021 në kohë të panjohur në Pejë, me detyrim ka kryer akt seksual pa pëlqimin e viktimës se mitur A.H e moshës katërmbëdhjetë (14) vjeçare, në atë mënyrë që pasi i pandehuri njoftohet më viktimën përmes rrjeteve sociale, më pas i njëjti vjen në qytetin e Pejës dhe takohet më viktimën për t’u njoftuar më për se afërmi, dhe pas këtij takimi, i pandehuri prapë vjen në qytetin e Pejës dhe pasi takohet më të dëmtuarën, e merr të njëjtën dhe e dërgon në villat tek rrethi i Ukaj në Pejë, ku e kryen aktin seksual”, thuhet në akuzën ndaj Edison Fazliut.

Ndërkaq Petrit Llugaliu akuzohet se në gusht të 2021-ës, kishe cytur të miturën 14-vjeçare t’i ekspozojë pjesët intime të trupit, ku më pas e kanos me fjalët “Kur të bahet 1 minut nuk të shoh tu hi me shkru e sheh çka bahet k… mos të han” dhe “Vonohesh e sheh, ej ku hamami je, qe spo fol a, ku je, Hiq mos i kthe bravo të qoftë nesër të tregoj unë ty”.

Gazeta Insajderi kishte raportuar ekskluzivisht lidhur me rastin. Njëri nga të akuzuarit nuk ishte paraqitur fare në gjykatë, nën pretendimin se është në Gjermani dhe s’po e lënë familja e bashkëshortes të kthehet në Kosovë.