Mesazhet i zbulojnë: VV drejt marrëveshjes me Listën Serbe?

Pamje të kapura nga kamerat brenda Kuvendit të Kosovës kanë nxjerrë në pah biseda të brendshme që ngjallin dyshime për një bashkëpunim të mundshëm mes Lëvizjes Vetëvendosje dhe Listës Serbe.

Elbert Krasniqi, përfaqësues nga komuniteti egjiptian, është parë duke komunikuar përmes mesazheve me një person të identifikuar me inicialet A.K, raporton Paparaci.

Në njërin prej mesazheve, Krasniqi shkruan qartë: “4 vota Listës Serbe na votojnë Qeverinë”, një deklaratë që sugjeron se formimi i Qeverisë mund të varet nga votat e këtij subjekti politik serb, shpesh i konsideruar si zgjatim i Beogradit zyrtar në Kosovë.

E gjithë kjo ndodh në një moment të ndjeshëm politik, ku Lëvizja Vetëvendosje, si fituese e zgjedhjeve të 9 shkurtit, po shkon në seancën konstituive pa bërë të qartë nëse i ka votat e nevojshme për të zgjedhur Kryetarin e Kuvendit dhe për të formuar Qeverinë.

Këto zhvillime kanë ringjallur debatet për qëndrueshmërinë e parimeve të Vetëvendosjes dhe për mundësinë e një bashkëpunimi të heshtur me Listën Serbe, një skenar që dikur konsiderohej i papranueshëm për këtë subjekt politik.