Detaje të reja

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhunë psikike e fizike nga bashkëshortët e tyre dhe anëtarët tjerë të familjes. Një rast i tillë ka ndodhur së fundmi në Dobrotin të Graçanicës, ku një grua shtatzënë është sulmuar fizikisht nga bashkëshorti i saj, raporton ekskluzivisht Gazeta Sinjali.

Ngjarja ka ndodhur pasditen e djeshme rreth orës 18:00, kur në Stacionin Policor në Graçanicë është raportuar një rast aktiv i dhunës në familje.

Burimet e Sinjalit kanë bërë me dije se në vendin e ngjarjes kanë dalë menjëherë patrulla policore dhe njësia hetimore, të cilët në vendin e ngjarjes kanë gjetur të dyshuarin dhe viktimën.

Sipas deklaratës së viktimës, pas një përplasjeje verbale, burri i saj e ka goditur disa herë në fytyrë dhe më pas ka tentuar t’ia marrë telefonin nga dora, për ta penguar që të thërrasë Policinë.

Ajo është dërguar për kontroll mjekësor, ku mjeku kujdestar ka konstatuar se ndodhet në gjendje të mirë shëndetësore, por me shenja dhune në fytyrë.

Në deklarimin para hetuesve, viktima ka konfirmuar se dhuna ka ndodhur edhe më parë, por nuk e kishte raportuar.

Pas konsultimit me Prokurorin kujdestar për dhunë në familje, është urdhëruar inicimi i rastit.