31-vjeçarja me probleme mendore kërkon abort, dyshohet për dhunim
Burime të Gazeta Sinjali brenda Klinikës së Gjinekologjisë në Prishtinë kanë raportuar për një rast shqetësues që ka ngritur alarmin mes stafit mjekësor dhe autoriteteve.
Mëngjesin e sotëm, një grua 31-vjeçare nga një fshat i komunës së Vitisë (emër i njohur për redaksinë), e cila sipas mjekëve vuan nga probleme të theksuara mendore, është paraqitur në klinikë duke kërkuar abort.
Pas ekzaminimit të kryer nga stafi mjekësor, është konstatuar se gruaja është shtatzënë. Ajo nuk ka mundur të ofrojë asnjë informacion në lidhje me identitetin e babait të fëmijës. Ky fakt, në kombinim me gjendjen e saj mendore, ka ngritur dyshime serioze tek mjekët se mund të bëhet fjalë për një rast të mundshëm dhunimi.
Sipas burimeve, gjendja mendore e 31-vjeçares nuk e bën atë të aftë për të dhënë pëlqim të vetëdijshëm për marrëdhënie intime, e aq më pak për të ruajtur apo komunikuar detaje mbi to. Kjo ka shtuar shqetësimin se shtatzënia mund të jetë pasojë e një akti të dhunshëm.
Menjëherë pas konstatimit të kësaj situate alarmante, stafi mjekësor i Klinikës së Gjinekologjisë ka raportuar rastin në Policinë e Kosovës. Autoritetet pritet të nisin hetimet e nevojshme për të zbardhur rrethanat e kësaj shtatzënieje dhe për të verifikuar nëse ka pasur ndonjë vepër penale të kryer ndaj gruas. Ky rast i rëndë thekson nevojën për mbrojtje të veçantë ndaj personave me aftësi të kufizuara mendore.
