Ende nuk është gjetur gruaja e zhdukur

Drejtoria e Policisë Rajonale në Ferizaj ka njoftuar se po vazhdon kërkimi për gruan nga Runjeva e Kaçanikut, zhdukja e së cilës është raportuar para tri ditësh.

Në njoftimin e Policisë thuhet se “më datë 27.04.2025, rreth orës 04:35, është raportuar zhdukja e H.J., 54 vjeçe, nga fshati Runjevë i Kaçanikut”.

“Sipas familjarëve, ajo ka dalë nga shtëpia në orët e hershme të mëngjesit dhe nuk është kthyer më. Menjëherë pas raportimit, njësitë e policisë nga stacioni policor në Kaçanik, në bashkëpunim me njësi të tjera rajonale, kanë filluar operacionin e kërkimit në zonën përreth fshatit Runjevë”.

Sipas policisë në mbështetje të këtij operacioni janë angazhuar edhe Shoqata e Kosovës për Kërkim-Shpëtim, me operatorë në terren, dronë të sofistikuar dhe motoçikleta për terren të vështirë, Forca e Sigurisë së Kosovës (FSK), me pjesëtarë aktivë në kërkime, qytetarë vullnetarë nga komuniteti lokal.

“Kërkimet kanë vazhduar pandërprerë që nga momenti i raportimit dhe janë në zhvillim edhe aktualisht. Në terren po përdoren edhe dronë me kamera termike për të ndihmuar në lokalizimin e personit të zhdukur”, thotë policia, duke bërë të ditur se “deri në këto momente, H.J. ende nuk është gjetur dhe operacioni i kërkimit do të vazhdojë”.