Nxënësit e Gjimnazit “Aleksander Xhuvani” sjellin ekspozitën kundër diskriminimit: “Një realitet që duhet thyer”

Më 6 maj 2025, në Galerinë e Qytetit, do të hapet ekspozita me titullin “Diskriminimi – Një realitet që duhet thyer”, një projekt artistik i krijuar me pasion dhe përkushtim nga nxënësit e Gjimnazit “Aleksander Xhuvan”, me mbështetjen e Kosova Education Center – KEC.

Ky projekt lindi si një iniciativë e Olti Malokut, Dea Osmanit dhe Aulona Toverlanit, në bashkëpunim me nxënës të tjerë të gjimnazit, dhe nën mbikëqyrjen profesionale të prof. Mirsime Zhitia. Përmes veprave të tyre artistike, nxënësit adresojnë plagët e diskriminimit dhe ndikimin e tij në jetën e përditshme, duke përdorur artin si një mënyrë për të thyer heshtjen dhe për të hapur rrugë drejt ndryshimit shoqëror.

Ekspozita përfaqëson një punë shumëvjeçare, ku të rinjtë kanë shprehur ndjesitë, përjetimet dhe vizionin e tyre për një shoqëri më të barabartë. Secila vepër është një thirrje për reflektim, një mesazh kundër paragjykimeve dhe një dëshmi e fuqisë së artit për të ndikuar në vetëdijen kolektive.

Hapja e ekspozitës do të mbahet të martën, më 6 maj 2025, ora 18:00, dhe të gjithë qytetarët, artdashësit, institucionet dhe mediat janë të mirëpritur të marrin pjesë.

“Përmes kësaj ekspozite nuk duam thjesht të tregojmë art, por të themi një të vërtetë që shpesh anashkalohet. Diskriminimi është real, por bashkë mund ta sfidojmë dhe ta ndryshojmë këtë realitet.” – deklarojnë autorët e projektit.