Baba me djemtë bëhen llom mes vete

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhunë psikike e fizike nga bashkëshortët e tyre dhe anëtarët tjerë të familjes, raporton Gazeta Sinjali.

Një rast i tillë është raportuar sot në fshatin Serbobran të Istogut, ku një përplasje mes babait dhe djalit ka eskaluar në dhunë fizike, me pasoja për të gjithë të përfshirët. Për këtë rast raportoi ekskluzivisht Sinjali.

Pas raportimit të mëhershëm, në Gazetën Sinjali kanë arritur informata të reja, nga ku është mësuar ekskluzivisht se sot rreth orës 16:30, Policia e Kosovës është njoftuar për një incident brenda një familjeje.

Sinjali mëson se Besmir Rama, rreth 28-vjeçar, dhe Vesel Rama, rreth 61-vjeçar janë identifikuar si të dyshuar, ndërsa Valmir Rama, rreth 30-vjeçar, si viktimë.

Sipas burimeve të Sinjalit, gjithçka nisi pas një mosmarrëveshjeje brenda familjes, ku Besmir Rama – i dyshuari kryesor,  ka sulmuar fizikisht babanë e tij, Vesel Rama, ku ky i fundit ka reaguar në vetëmbrojtje duke goditur të birin me një copë druri në kokë, duke i shkaktuar lëndime të lehta.

Të gjithë të përfshirët kanë marrë trajtim mjekësor, ndërsa pas ndërhyrjes së patrullës policore dhe intervistimit të palëve, është konsultuar prokurori kujdestar, i cili ka urdhëruar që: Besmir Rama të ndalohet për 48 orë për shkak të dhunës së ushtruar, ndërsa Vesel Rama të procedohet në liri, pasi veprimi i tij është konsideruar reagim në moment.

Rasti është iniciuar zyrtarisht si “Dhunë në familje”.

Gazeta Sinjali do të sjellë detaje të tjera rreth këtij rasti të ndjeshëm që ekspozon realitetin e dhunës së brendshme familjare, shpesh të heshtur, por me pasoja të rënda.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.